د افغانستان لپاره د سویډن کمیټې لخوا په ننګرهار کې ښوونځیو سره د میزونو او چوکیو مرسته وشوه
د افغانستان لپاره د سویډن کمیټې د ختیځ ننګرهار ولایت په دولتی ښوونځیو کې څه د پاسه نهه میلیونه افغانیو په لګښت د بیارغونې پروژي پلي کړلي. پدې پروژو کې چې یاد ښوونځيو کې د زده کوونکو لپاره د میزونو او چوکیو مرسته هم وشوه د افغان کنکشن لخوا تمویل شوې وه.
افغان کنکشن یوه آروپایې مرستندویه اداره ده چې په افغانستان کې ښوونځي، ښوونکي او د زده کوونکو لپاره د لوبو فرصتونه برابروي.
په ختیځ ننګرهار کې پلي شوو پروژو کې د کریکټ د لوبې لپاره پچونو او د والیبیال لوبې لپاره د میدانونو جوړول او همدارنګه د ښوونځیو د ودانیو چتونو رغول شامل وو.
په ختیځ زون کې د افغانستان لپاره د سویډن کمیټې د دفتر مشر ښاغلی انجنیئر عبدالاحد سمون په ننګرهار عالي لیسه کې د ښووني او روزني د پروګرام منیجر ښاغلی محمد اکرم عبدالرحیمزی او د پوهنې د ریاست یو شمیر چارواکو په شتون کې د پوهنې د ریاست مرستیال رئیس ښاغلی محمد عیسی خان ته د دې کمیټې لخوا مرسته شوي میزونه او چوکۍ وسپارلي.
د ننګرهار عالی لیسې لپاره ۳۰۰، خواجه رزق الله ښوونځي لپاره ۱۲۰، او د سراچه نجونو ښوونځي او د یاسین بابا نجونو ښوونځي ته ۱۶۰، ۱۶۰ میزونه او چوکۍ ورکړل شوي. همدارنګه په یاد ښوونځیو کې د والیبال د لوبو میدانونه او معلولیت لرونکو زده کوونکو لپاره د کرکټ د لوبې لپاره یو پچ هم جوړ شوې دې.
د ننګرهار عالی لیسې یو زده کونکی محمد فیصل وايې: ((پخوا به مونږ په زړو او شلیدلو دریو کیناستلو، چې هغې سره به زمونږ کالی چټل کیدل، مونږ ته خپلو زده کړو ته توجه هم نشوه کولی. خو اوس مونږ په میزونو او چوکیو کیښنو. اوس مونږ کولای شو چې په سمه توګه زده کړي وکړو.))
په ختیځ زون کې د افغانستان لپاره د سویډن کمیټې د دفتر مشر ښاغلی انجنیئر عبدالاحد سمون ژمنه وکړه چې یاده کمیټه به د افغانستان د پوهنې په برخه کې خپلو مرستو ته دوام ورکړي. د پوهنې د ریاست مرستیال رئیس ښاغلی محمد عیسی خان د افغانستان لپاره د سویډن کمیټې څخه د مرستو مننه وکړه. هغه زده کوونکو ته لارښوونه وکړه چې په ټولګیو کې د میزونو او چوکیو ته پاملرنه وکړي او د زیانمنولو څخه دی ډډه وکړي.