د افغانستان لپاره د سویډن کمېټې د ننګرهار په ګوشتې ولسوالۍ کې ۹۸۰۰ کورنیو ته د پاکو اوبو څښلو زمینه برابره کړه
د افغانستان لپاره د سویډن کمېټې د کلیو پراختیا پروګرام له لوري د ننګرهار ګوشتې ولسوالۍ کې د پاکو اوبو رسولو د درې پروژو چارې بشپړې او ګټې اخیستنې ته وسپارل شوې.
د پاکو اوبو رسولې دا پروژې چې سولرې او د اوبو ذخیرې پکې شاملي دي د کوزې زېړۍ، بره زېړۍ او اوکړایي شوراګانو کې عملي شوې چې د یادو سیمو ۹۸۰۰ کورنۍ به ترې ګټه پورته کوي. د افغانستان لپاره د سویډن کمېټې پدې پروژو څه باندې ۳،۹ میلیونه افغانۍ لګولي او څه باندې ۵ سوه زره افغانۍ پکې ولسونو همکاري کړې.
د افغانستان لپاره د سویډن کمېټې د جلال اباد سیمه ییز اداري دفتر مشر انجینر عبدالاحد سمون د یادو پروژو د عملي کېدو په برخه کې د ګوشتې ولسوالۍ د یادو سیمو خلکو له فعاله ګډون قدردانی وکړ او ژمنه یې وکړه چې سویډن کمېټه به پدې ولسوالۍ کې خپلو فعالیتونو ته دوام ورکړي.
د کوزې زېړې شورا قومي مشر ۵۵ کلن محمد امین د افغانستان لپاره د سویډن کمېټې په مننې سره وویل چې د دې پروژو له عملي کېدو سره یې اساسي اړتیا پوره شوه او د پاکو اوبو څښلو زمینه ورته برابره شوه.
نوموړي وويل “ موږ تر اوسه دلته له بارانه پرته روانې اوبه نه وي لیدلې او اوس د ډېرې خوښۍ ځای دی چې د سویډن کمېټې له برکته مو په کورونو کې اوبه بهیږي او ډېر لوی انساني خدمت یې وکړ. موږ به وړاندې د بارانونو او سیلابونو له اوبو د څښاک لپاره ګټه پورته کوله. الله په موږ لوی رحم وکړ”
د سیمې د اوسیدونکو په وینا چې وړاندې به یې له ډېرو لیرې ځایونو اوبه په څارویو او د دوی ښځو په سرونو راوړي چې له ستونزو او کړاوه خالي نه و.
لس کلنه شکریه چې د برې زیړۍ اوسېدونکې ده ډېره خوښه ده او زیاتوي” ما به وړاندې له خوړه په سر اوبه راوړلې چې ډېره زیاته به ستړې کېدم. اوس چې د اوبو دا ذخیرې جوړې شوي، په ډېرې اسانۍ دلته راځم او اوبه وړم”
د افغانستان لپاره د سویډن کمېټه د افغانستان په ختیځ ننګرهار، لغمان او کونړ ولایتونو کې د کلیو پراختیا، ښوونې او روزنې او د معلولینو بیارغونې برخو کې اړمنو افغانانو ته خدمتونه وړاندې کوي چې تمرکز یې په لریو پرتو سیمو دی.